Dahiliye nezaret-i celilesi canib-i alisine
Maruz-ı çaker-i kemineleridir
Sivas vilayetine tabi’ Koçgiri kazasında Boğazveren karyesinde sakin Beydağlı Alişan Beyi’n Erzurum vilayeti dahilinde bulunan Kuruçay kazasının çekmurt karyesinin merasını ve pek çok tarlalarını cebr ve tagallüble zabt ve karyemiz ahalisini intifa’dan mahrum eylediğinden bahisle makam-ı samilerine takdim etmiş olduğum müteaddid istida’lar üzerine Erzurum vilayetinden vuku’ bulan isti’lamlara sathi cevablar vürud edüb tefhim buyurulması üzerine tekrar takdimine mütecasir olduğumuz şikayetnamelerden dolayı vilayet-i müşarünileyhadan vaki’ olan isti’lama mevrud fi 17 kanunusani sene 324 tarihli telgrafnamede karyemizden osman ve dursun ve nazif’in iki kıt’a tarlaları mütegallib-i mumaileyh Alişan bey’in yedinde merhun olduğu arz ve iş’ar olunmuş iken mumaileyh Alişan beyin veresesi muhakemede tahvil-i …san ile yine tagallübü ele alarak mezkur iki kıt’a tarlanın pederleri Alişan Bey’den …..len ve hakk-ı karar ile güya tasarruf etmekte oldukları ve rehini münkir (?) bulundukları mahallinden alınan cevabdan müsteban olmaktadır. Erzurum vilayetinden mevrud mezkur telgrafta mütegallib-i mumaileyh mezkur iki kıt’a tarlanın yed-i irtihanette idüğü arz ve iş’ar olunduğu halde veresesinin diğer güna ifade ile tarla sahiblerini tasarruflarından mahrum edilmeleri adalete menafi bulunduğu cihetle mezkur tarlaların sahiblerine iadesi zımnında keyfiyetin vilayet-i müşarünileyhaya te’kiden emr ve iş’ar buyurulması adalet namına istirham olunur ol babda emr ü ferman hazret-i menle-ül-emrindir.
Fi 19 cemaziyülevvel sene 1327 ve fi 26 mayıs sene 1325
Tophane’de iskelede sakin mezkur çekmur karyesi ahalisinden Hacı Hasan
0054
Dahiliye mektubi kalemi
Evrak numerosu: 1164-3
Tesvidi tarihi: 4 haziran sene 325
Tarih-i tebyizi: 6 cemaziyülevvel sene 327, 6 haziran sene 325
Erzurum vilayet-i behiyyesine
Çekmurt karyesi ahalisinin …. zabt ve ….. olunan tarla ve meraları hakkında yazılan 28 mayıs sene 325 tarihli ve yüz elli altı numerolu tahrirat cevabının bir an evvel itası tezekkür olunur ol babda